سطرين بيبدلوا شكل الحياة
ويغيروا فى صمت المبانى
ووحشة الغربا
ومرورك الخاطف فى الثواني
أكتب لها يمكن ترد ؟
تغير طبيعة صمتها
وتحن للهفة فى أيديك
سيب حروفك حبل ع الغارب
ح ترد ع الحيلة بحيلة
وتقولك الدفا بيحن للمسة أيديك
طب يروح البرد منك فين
وقسوة الجدران
والحياة نقصاها المعانى
كنت أنتظر
لما العتمة تقايض دموعها بالأفراح
لما تشرب الشوارع ميتها المالحة
وترق الأرصفة لحضن المشاة
أكتب لها : عن الحلم اللى شاب
وعن سر الغياب
وسحر الأغانى القديمة فى الفراق
والذكريات المنسية تحت أعقاب البيبان
عن غفلة الحراس لما يحل القضا
ويسرق أخر ضى فى شروق الصباح
أكتب لها ….
